توێژینەوە زانستییەکان دەریانخستووە، کە یاریزانانی بواری تۆپی پێ بەهۆی لێدانی تۆپ بەسەر دووچاری کێشەی تەندروستی دەبنەوە.
بەپێی توێژینەوەیەکی ماتماتیکی زانکۆی گلاسگۆ کە لەژێر سەرپەرشتی فیدراسیۆنی تۆپی پێی ئینگلتەرا و ڕایەڵەی یانە پڕۆفیشناڵەکان لەسەر حەوت هەزار و 676 کەس ئەنجامدراوە، دەرکەوتووە زۆرینەی یاریزانانی بواری تۆپی پێ بەهۆی لێدانی سەرەوە و لەگەڵ هەڵکشانیان بەتەمەن تووشی خڵەفان دەبن.
توێژینەوەکە 22 مانگی خایاندووە و بەراوردی دۆخی تەندروستی یاریزانانی لە نێوان ساڵانی 1900 بۆ 1976 تاوەکو ئێستا کردووە و دەرکەوتووە، ئەو کەسانەی یاری تۆپی پێیان کردووە بە نێوەندی ڕێژەی 3.5 زیاتر لە کەسانی ئاسایی توشی کێشەی کۆ ئەندامی دەمار بوون بەتایبەت نەخۆشی خڵەفان، هەندێکیشیان دووچاری نەخۆشی پارکینسۆن و زهایمەر بوون.
یەکێک لە نمونەکان کە وەرگیراوە، یاریزانانی هەڵبژاردەی ئینگلتەرا بوون لە ساڵی 1966 کاتێک نازناوی مۆندیالیان بەدەستهێناوە، لە نێوانیاندا 11 یاریزان دووچاری نەخۆشی خڵەفان و زهایمەربوون کە جاک چاڕڵتۆن یەکێکبووە لە یاریزانەکان.
لە ئێستادا فیدراسیۆنی تۆپی پێی ئینگلتەرا بە هاوکاری فیدراسیۆنی تۆپی پێی جیهان و لەژێر سەرپەرشتی ئارسن ڤینگەر کە بەرپرسی کەرتی لاوانە، لە کاردان بۆ لێکۆڵینەوەی زیاتر و دەرکردنی چەند بڕیارێک لەم بارەیەوە، ئەگەر بێتو توێژینەوەکانی دیکە هەمان ئەنجام دەربخەن ئەوا بە ناچارییەوە بڕیارێک لەبارەی لێدانی سەرەوە دەدرێت بەتایبەت لە کەرتی منداڵان و لاوان.
ئەگەرێکی بەهێز لە ئارادایە، لە ئینگلتەراوە لێدانی سەر قەدەغە بکرێت، یاخود بەلایەنی کەمەوە لە ڕوبەڕوبوونەوەکانی تۆپی پێی ئینگلتەرا سنورداربکرێت.
