د.بەرهەم ساڵح، سەرۆککۆماری عێراق ئەمڕۆ دووشەممە 5ی تشرینی دووەم، پێشوازیکرد لە فەریقی یەکی روکن عەبدولئەمیر یارەڵا، سوپاسالاری عێراق و “جەختیكردەوە لە گرنگیی ھەماھەنگی نێوان سوپا و پێشمەرگە بۆ ڕێشەکێشکردنی تیرۆر.”
بە گوێرەی ڕاگەیاندراوی سەرۆكایەتیی كۆمار، لە دیدارەکەدا سەرۆککۆمار دەستخۆشیکردووە لە هێزە ئەمنییەکان بە سەرجەم پێکهاتەکانییەوە بە سوپا و پێشمەرگە و حەشدی شەعبی لە راوەدوونانی پاشماوەکانی گرووپی تیرۆرستی داعش، کە مەرامیانە ئاسایش و ئارامیی وڵات بشێوێنن، ھاوکات ئاماژەشیکرد بۆ ئەوەی کە جەنگی دژ بە تیرۆر بەردەوامە و پێویستە ھێزە ئەمنییەکان ھەوڵەکان یەکبخەن بۆ رێشەکێشکردنی پاشماوەکانی تیرۆر.
ھەر لە دیدارەکەدا سەرۆک کۆمار جەختیکردەوە لە پێویستی پتەوکردنی ئاسایش و سەقامگیری وڵات و پارێزگاریکردن لە دامەزراوە حکومی و نێردە دیبلۆماسییەکان و چەسپاندنی دەسەڵاتی دەوڵەت لە سەپاندنی یاسا و بەرەنگاربوونەوەی تیرۆریستان.
لە ڕاگەیاندراوی سەرۆكایەتیی كۆمار دا هاتووە، “سەرۆک بەرھەم ئاماژەیکردووە بە پێویستیی بەهێزکردنی توانای هێزە ئەمنییەکان لە ڕووی راهێنان و پڕچەککردن و پەرەپێدانی توانا سەربازییەکان و هەماهەنگی ئەمنیی هاوبەش بۆ بەرەنگاربوونەوەی تیرۆر و ئاڵنگاری و رێگریکردن لە بۆشاییە ئەمنییەکان، بۆ ئەو مەبەستەش سەرۆک بەرھەم جەختیکردووەتەوە لە ھەماھەنگیی نێوان سوپا و پێشمەرگە و حەشدی شەعبی بۆ رێشەکێشکردنی تیرۆر و پاراستنی سەقامگیری و ئارامیی وڵات.”
وەك لە ڕاگەیاندراوی سەرۆكایەتیی كۆمار دا هاتووە، “سوپاسالاری عێراق سوپاسی سەرۆککۆماری کرد بۆ بەدواداچوون و پشتیوانیکردنی دەزگاکانی ئاسایش لە بەجێگەیاندی ئەرکەکانیان بۆ بەرەنگاربوونەوەی تیرۆر و سەپاندنی یاسا و دابینکردنی ئاسایش بۆ هاوڵاتییان”.
لەلایەكی دیكەوە هەر ئەمڕۆ، لەمیانی كۆبوونەوەیەك كە لەنێوان بەرهەم ساڵح و جینین هێنیس پلاسخارت، نوێنەری تایبەتی سکرتێری گشتیی نەتەوەیەکگرتووەکان لە عێراق بەڕێوەچوو، جەختكراوەتەوە لە گرنگی ئەنجامدانی هەڵبژاردنەکانی ئەنجومەنی نوێنەرانی داهاتوو، لەسەر بنەمای پاکی و بێگەردی لەسەرجەم قۆناغەکاندا.
