فەرماندەیی ئۆپەراسیۆنە هاوبەشەکانی عێراق ڕەتیکردەوە هیچ هێزێکی پێشمەرگە لە ناو کەرکوکدا بوونی هەبێت.
لیوا تەحسین خەفاجی، وتەبێژی فەرماندەیی ئۆپەراسیۆنە هاوبەشەکانی عێراق ڕایگەیاند، “سوپای عێراق و پۆلیسی فیدراڵی لە کەرکوک بوونیان هەیە، هەروەها هەماهەنگی لەنێوان ئەو هێزانە و هێزەکانی پێشمەرگەشدا هەیە، بەڵام هیچ هێزێکی پێشمەرگە لەناو کەرکوکدا بوونی نییە”.
وتەبێژی ئۆپەراسیۆنە هاوبەشەکان وتیشی، “کاری هاوبەشمان هەیە لەگەڵ هێزەکانی پێشمەرگە بۆ ڕوبەڕوبوونەوەی تیرۆر و ڕاوەدونانی چەکدارانی داعش”.
ئەو بەرپرسەی ئۆپەراسیۆنە هاوبەشەکان لە هەمان کاتدا ڕەتیکردەوە هیچ جوڵە و هەنگاوێک هەبێت بە ئاڕاستەی چونی هێزی پێشمەرگە بۆ کەرکوک یان بوونی ئەو هێزە لە ئێستادا لە شارەکە.
