بەهۆی واژوونەکردنی بۆندی نوێ و فرۆشتنی چەند یاریزانێکەوە، زینەدین زێدانی ڕاهێنەری یانەی ڕیاڵ مەدرید ناچاردەبێت کەلێنەکانی پێکهاتەکەی بە لاوانی کاستیا پڕبکاتەوە.
ڕۆژنامەی ئاسی ئیسپانی ئاشکرایکردووە، کە ڕۆیشتنی ئۆدیگارد و لوکا یوڤیچ لەڕووی ژمارەیی و ڕێژەی یاریزانانەوە کاریگەری لەسەر پێگەی زێدان دروستدەکات، لە بەرانبەردا ئیدارەی فلۆرنتینۆ پێرێز بەهۆی قەیرانی داراییەوە هیچ بۆندێکی جێگرەوەیان بۆ دابین نەکردووە.
زێدان بە ناچارییەوە و بۆ پڕکردنەوەی کەلێنەکان هانای بۆ “کارگەی سپی” بردووە، کە ناسناوی تیپی کاستیا و دووەمی یانەی شاهانەیە.
کاستیا لەلایەن ڕائول گۆنزالێسی ئەفسانەی یانەوە سەرپەرشتی دەکرێت، لەسەر خواستی ئەم کەسایەتیە هەریەک لە یاریزانان، سێرجیۆ ئاریباس، ئەنتۆنیۆ بلانکۆ کوندی، میگێل گوتیرێز، ڤیکتۆر چۆست بۆ پێکهاتەکانی زێدان بەرزکراونەتەوە، بەو هیوایەی فەرەنسیەکەی هاوڕێی بتوانێت لە قۆناغی دووەمی وەرزدا سوودیان لێوەربگرێت.
تەواوی ئەو یاریزانانەی ڕائول ئاڕاستەی پێکهاتەی یەکەمی زێدانی کردووە، پێکهاتوون لە بەهرەداران و ئەوانەی پاڵەوانیەتی لاوانی ئەوروپایان بردووەتەوە، کەمێک ئەزموونیان بەدەستهێناوە و دەتوانن لە ساتە ناهەموارەکان، یاخود لەکاتی پێکانی یاریزاناندا هاوشێوەی ڕیگیلۆن و کارڤاخال سوود بە یانەکە بگەیەنن.
