شارەزایەکی بواری کەشناسی ڕایدەگەیەنێت، هەفتەی داهاتوو تەرزە و باران دەگەڕێتەوە و پلەی گەرما دادەبەزێت.
پشتیوان پێنجوێنی، شارەزای بواری کەشناسی ڕایگەیاند، ڕۆژی شەممە و یەکشەممەی هەفتەی داهاتوو، بارستە هەوایەکی سارد ڕوودەکاتە تەواوی ناوچەکانمان و پلەی گەرما بەراورد بە ڕۆژانی ڕابردوو بەڕێژەی شەش پلەی سیلیزی نزمدەبێتەوە، بۆ ماوەیەکی کاتی کەش فێنک دەبێتەوە و کۆتایی بە گەرمای ڕۆژانی ڕابردوو دێت.
ئاماژەی بەوەشکرد، بە گشتی لە ناوچەکانمان ئاسمان ساماڵ و پەڵەهەور بۆ نیمچە هەور دەبێت، لە مەودای نیوەڕۆ بۆ ئێوارە، لە ناوچە شاخاوییەکان و ناوچەی جیا جیا، هەندێک کات ئاسمان دەگۆڕێت بۆ هەوری تەواو و تاوەبارانی کورتخایەن دەبارێت، لەگەڵ ڕوودانی هەورەبروسکەی بەهێز، هەروەها لە ناوچە شاخاوییەکان و قەزای پێنجوێن و دەوروبەری ئەگەری تەرزە بارینی بەهێز هەیە.
وتیشی، ئەم چەند ڕۆژە ئاسمان ناڕوون دەبێت و هەندێک کات خۆڵ و بارانی قوڕاو دەبارێت.
