پۆلیسی هەولێر دەستگیركردنی كەسێك بە تۆمەتی وەرگرتنی پارە و خۆشاردنەوەی لە خاوەن پارەكان ڕادەگەیەنێت.
بەڕێوبەرایەتی پۆلیسی پارێزگای هەولێر ئەمڕۆ چوارشەممە 3ی شوبات بڵاویكردەوە، نوسینگەی ڕۆژهەڵاتی بەشی پۆلیسی نەهێشتنی تاوان لە گەڕەكی كوێستان تۆمەتبارێكیان بە ناوی (ش.م.ج) تەمەن 55 ساڵ دەستگیركرد، كە لە تۆڕی كۆمەڵایەتیی فەیسبوك مامەڵەی بە دۆلاری كۆن و نوێ كردبوو و دوای ئەوەی پارەی لە هاوڵاتیان وەرگرتبوو، خۆی لێشاردبوونەوە.
دەشڵێت، تۆمەتباری ناوبراو، كە چەندین تاوانی لەو جۆرەی ئەنجامداوە و لە ژمارەیەك بنكەی پۆلیسیش داواكراوە، دانینا بە تاوانەكەیدا، بۆیە بە بڕیاری دادوەر و بەپێی مادەی (443) لە یاسای سزادان بەندكرا و لێكۆڵینەوەش لەگەڵیدا بەردەوامە.
پۆلیسی هەولێر ئاماژەشیداوە، هەر هاوڵاتییەك مامەڵەی هاوشێوەی كردووە و پارەی لێبردراوە، دەتوانێت سەردانی پۆلیسی نەهێشتنی تاوان بكات بە مەبەستی نوسینی سكاڵا لە دژی ئەو تۆمەتبارە.
