هاتوچۆی سلێمانی، هۆشداری بە شۆفێران دەدات.
بەڕێوەبەرایەتیی هاتوچۆی سلێمانی، بڵاویکردەوە، بەپێی پێشبینییەکانی کەشناسی شەپۆلێکی چڕی بارانبارین رووی لە شارەکەمان کردووە و ئەگەری دابارین بەشێوەی لێزمە و بەخوڕ هەیە لە ماوەکانی داهاتوودا، ئێمە وەک بەڕێوەبەرایەتیی هاتوچۆی سلێمانی ئامادەکاری تەواومان کردووە لە پێناو پاراستنی سەروماڵی هاوڵاتییان و شۆفێرانی شارەکەمان، سەرجەم مەفرەزە و ئالیەتەکانی بەڕێوەبەرایەتیمان لە حاڵەتی ئامادەباشیدان بۆ هەر ئەرکێک کە لە کاتی پێویستدا پێیان بسپێردرێت.
دەشڵێت، هەروەها بەشی راگەیاندن و هۆشیاری و رادیۆی ترافیک FMبەردەوام لە ئەرکدا دەبن و لە هەر حاڵەتێکی لە ناکاو ئاگاداریی بڵاودەکەنەوە بۆئەوەی شۆفێران بەدووربن لە هەر مەترسییەک ئەگەر بوونی هەبوو لە شەقام و رێگاکانی دەرەوەی شار.
ئاماژە بەوەشدەکات، لە روانگەی پەرۆشیمان بۆ سەلامەتیی هاوڵاتییان ئاگاداری سەرجەم شۆفێران دەکەین بەهاتنی ئەو شەپۆلە لە بارانبارین پابەندی رێنماییە سەلامەتییەکانی هاتوچۆ بن و نەچنە ئەو جێگایانەی ئەگەری کۆبوونەوەی باراناوی تێدا دەبێت و بەهیچ جۆرێک خۆیان نەخەنە دۆخێکی مەترسیدار و لەکاتی حاڵەتی پێویست دەتوانن پەیوەندی بە ژمارە خێراکان بکەن:
کۆنتڕۆڵی هاتوچۆی سلێمانی 188
بەرگری شارستانی 115
تەندروستی 122
پۆلیس 104
ئاسایش 106
