تیمی ڕێکخراوی تەندروستیی جیهانی، ئەمڕۆ یەکشەممە 31ی کانونی دووەم چوونە ئەو بازاڕەی ووهانی چین کە ناوەندی فرۆشتنی خۆراکی شارەکەیە و ساڵی ڕابردوو بەهۆی گومانی زۆر لەوەی ڤایرۆسی کۆرۆنا لەوێوە بڵاوبووەتەوە بۆ ماوەی 76 ڕۆژ داخرا.
تیمەکەی تەندروستیی جیهانی سەردانی بازاڕی بایشازویان کرد لە ووهان کە شوێنی فرۆشتنی گۆشتی گیاندارە دەریاییەکانە.
تیمەکەی تەندروستیی جیهانی پێکهاتوون لە پزیشکی ڤێتێرنەری، پسپۆڕانی زانستی ڤایرۆسی، پسپۆڕانی سەلامەتی خۆراک، پزیشکانی نەخۆشییە گواستراوەکان، تیمەکە تاوەکو ئێستا سەردانی دوو نەخۆشخانەی تایبەت بە کۆرۆنایان لە سەرەتای بڵاوبوونەوەی ڤایرۆسەکەوە کردووە، ئەوانیش نەخۆشخانەی جینیتانی ووهان و نەخۆشخانەی هۆبی.
هەروەها ڕۆژی شەممە سەردانی مۆزەخانەیەکی تایبەت بە سەرەتاکانی بڵاوبوونەوەی ڤایرۆسی کۆرۆنایان کرد لە ووهان.
ڕۆژی پێنجشەممەی ڕابردوو نوسینگەی سەرەکیی ڕێکخراوی تەندروستیی جیهانی لە جنێف ڕایگەیاند، تیمەکە لە سەردانەکەیاندا بازاڕی هوانان کە تایبەتە بە خواردنە دەریاییەکان یەکەم ئاماژەی COVID-19 لەوێوەبوو بەسەردەکەنەوە، سەردانی نەخۆشخانەکانی تایبەت بە تووشبووانی کۆرۆنا و تاقیگەکانی ووهان دەکەن.
تاوەکو ئێستاش دیار نییە کە تیمەکە کارەکانیان ماوەی چەند ڕۆژ دەخایەنێت و خشتەی کار و سەردانەکانیان بەتەواوی دیار نییە، چونکە ڕێکخراوی تەندروستیی جیهانی پێیانڕادەگەیەنێت لە چ شوێنێک لێکۆڵینەوە بکەن.
