بافڵ جەلال تاڵەبانی سەرۆکی یەکێتیی نیشتمانیی کوردستان، پەیوەندییەکی تەلەفۆنی لە محەمەد شیاع سودانی، سەرۆکوەزیرانی عێراق پێگەیشت و لەبارەی رێککەوتنی نەوت گفتوگۆیان کرد.
دواینیوەڕۆی ئەمڕۆ شەممە بافڵ جەلال تاڵەبانی سەرۆکی یەکێتیی نیشتمانیی کوردستان، پەیوەندییەکی تەلەفۆنی لە محەمەد شیاع سودانی، سەرۆکوەزیرانی عێراق پێگەیشت و لە سەرەتای پەیوەندییەکەدا محەمەد شیاع سودانی، سەرۆکوەزیرانی عێراق زۆر سوپاسی بافڵ جەلال تاڵەبانی کرد بۆ ئەو هەموو هەوڵ و کۆشش و دەستپێشخەرییانەی کە لە ماوەکانی رابردوودا داویەتی بۆ لێکنزیکبوونەوەی هەردوو حکومەتی عێراق و حکومەتی هەرێمی کوردستان تاوەکو گەیشتن بە رێککەوتنی هەناردەکردنەوەی نەوتی هەرێمی کوردستان و پیرۆزبایی خۆی پێراگەیاندن.
هەر لەو پەیوەندییە تەلەفۆنییەدا سودانی، رۆڵی سەرۆکی یەکێتیی نیشتمانیی کوردستانی بەرزنرخاند وەک کارەکتەرێکی سەرەکی لە بونیادنانی ئەو رێککەوتنەدا و رایگەیاند، “ئەو رێککەوتنە دەستپێکێکە نەک تەنیا بۆ چارەسەری کێشەی مووچە، بەڵکو چارەسەرە بۆ بووژانەوە و وەبەرهێنانی زیاتر لەپێناو گەشەپێدانی زیاتری هەرێمی کوردستان و عێراق.
لە بەشێکی دیکەی پەیوەندییە تەلەفۆنییەکەدا بافڵ جەلال تاڵەبانی سوپاسی سەرۆکوەزیرانی عێراقی کرد و پیرۆزبایی رێککەوتنەکەی لێکرد و رایگەیاند، بە هیواین سەرجەم شایستە داراییەکانی هەرێمی کوردستان لە دوای ئەم رێککەوتنە وەک ماف و بەپێی دەستوور بۆ هەرێمی کوردستان بنێردرێت، ببێتە هۆکاری سەقامگیریی زیاتر لە وڵاتدا.
هاوکات پابەندبوونی هەردوو حکومەتی عێراق و هەرێمی کوردستانی بە رێککەوتنەکەوە بە پێویست زانی.
