وتەبێژی وەزارەتی تەندروستیی عێراق رایگەیاند، چاوەڕێی ئەنجامی پشکنینیەکان دەکەن بە مەبەستی زانینی ھۆکاری زیادبوونی نەخۆشیی هەوکردنی پەردەی مێشک لە سلێمانی و دواترئەنجامەکانی بڵاودەکەنەوە.
سەیف بەدر وتەبێژی وەزارەتی تەندروستی عێراق رایگەیاند، “نەخۆشی ھەوکردنی پەردەی مێشک لە عێراق بوونی ھەبووە و بەشێوەی تاک لە سەرجەم ناوچەکان تۆمارکراون، بەڵام ئەوەی سلێمانی و ناوچەکانی دەوروبەری ھەیە بریتییە لە زیادبوونێکی رێژەی نەخۆشییەکە”.
ئاماژەی بەوەشکرد،، “تیمێکی شارەزا سەردانی سلێمانی کردووە و پشکنین کراوە و نموونە لە نەخۆشییەکە وەرگیراوە و نێردراوە بۆ تاقیگەی تەندروستیی گشتی لە بەغداد، چاوەڕێی ئەنجامەکان دەکەن بە مەبەستی زانینی ھۆکاری زیادبوونی نەخۆشییەکە و دواتر ئەنجامەکەی و ھەر وردەکارییەکی تر بە فەرمی بڵاودەکەینەوە”.
جەختیشیکردەوە، “خاڵی گرنگ ئەوەیە تا ئێستا ھیچ حاڵەتێکی مردن بە نەخۆشییەکە نییە و سەرجەم حاڵەتە تۆمارکراوەکان لەژێر کۆنتڕۆڵدان و نەخۆشەکان وەڵامیان بۆ چارەسەرەکان ھەیە و زۆرینەیان نەخۆشخانەیان جێھێشتووە”.
