جێگری سەرۆک وەزیرانی هەرێم، رایگەیاند، رێککەوتنەکە دەرگا لەسەر چارەسەرکردنی بنەڕەتیی هەموو کێشەکان دەکاتەوە
قوباد تاڵەبانی، جێگری سەرۆک وەزیرانی هەرێم، رایگەیاند، رێککەوتنی هەرێم و بەغداد لەسەر پرسی هەناردەکردنەوەی نەوت، دەستکەوتێکی گەورەیە بۆ خەڵکی کوردستان و عێراق و دەرگا لەسەر چارەسەرکردنی بنەڕەتیی هەموو کێشە و ناکۆکییەکانی دیکەمان بەپێی دەستوور و لەڕێی گفتوگۆ و دانووستانی بەردەوامەوە دەکاتەوە.
ئاماژەی بەوەشکرد، لە دوای ئەم رێککەوتنە، هەوڵەکانمان چڕتر دەکەینەوە بۆ دابینکردن و گەرەنتیکردنی هەموو ماف و شایستە داراییەکانی خەڵکی کوردستان، چونکە دوای ساڵانێکی زۆر لە قەیران و ناکۆکی، ئێستا کاتی خزمەتگوزاری و ئاوەدانکردنەوە و کارکردنی هەمەلایەنەیە بۆ گەشەپێدانی هەرێمی کوردستان و عێراق لە هەموو روویەکەوە.
باسی لەوەشکرد، زۆر سوپاسی تیمەکانی دانووستانکار و ئەو کەس و لایەنانە دەکەم کە بەردەوام هاوکار و پشتیوانی گەورە بوون بۆ سەرکەوتنی دانووستانەکان و بەبێ ئەوان ئەم دەستکەوتە گرنگە بەدی نەدەهات.
