لەتیف نێروەیی، ئەندامی سەركردایەتیی یەكێتیی نیشتمانیی كوردستان رایدەگەیەنێت، سلێمانی ئارامە و ئاسایش بەرقەرارە.
ئەو ئەندامەی سەرکردایەتیی یەکێتی بڵاویکردووەتەوە، “لەم هەفتەیەدا چەندین چالاكیی رۆشنبیری و نێودەوڵەتی لە سلێمانی بەڕێوەدەچن، ئەمەش مانای ئەوە دەگەیەنێت، كە سلێمانی زۆر ئارامە و ئاسایش بەرقەرارە، بۆیە ئەم چالاكییانە لە پارێزگای سلێمانی لە كۆتایی ئەم مانگە بەڕێوەدەچن”.
دەشڵێت، رۆژی 25ـی 8ـی 2025، كۆنفرانسێكی نێودەڵەتی لە شاری سلێمانی، لە ژێر ناوی جینۆسایدی كورد و رەنگدانەوەی لە (ئەدەب، هونەر، میدیا)ـدا بەڕێوەدەچێت، كە لەلایەن وەزارەتی رۆشنبیری و لاوانی حكومەتی هەرێمی كوردستانەوە ئەنجامدەدرێت و میوانەكان لە حەوت وڵاتی جیهانەوە بەشداردەبن و كۆنفرانسەكە دوو رۆژ دەخایەنێت.
ئاماژەی بەوەشكردووە، هەر لە رۆژی 25ـی ئەم مانگەدا، مەراسیم و دیبەیتێكی تایبەت بە وڵاتی چین، بە بەشداریی چەندین دیپلۆماتكار و كەسایەتیی سیاسی، رۆشنبیر و میدیاكار لە سلێمانی بەڕێوەدەچێت.
لەتیف نێروەیی ئەوەشی خستووەتەڕوو، لە چوار رۆژی كۆتایی مانگ، کۆنگرەیەكی فراوانی نێودەوڵەتی تایبەت لە شاری سلێمانی، بە بەشداریی سەدان كەس بەڕێوەدەچێت.
