بەڕێوەبەرایەتیی پۆلیسی دارستان و ژینگەی سلێمانی رایدەگەیەنێت، لە سنووری گوندی کلکەسماق، ئاگر کەوتەوە و بەهۆیەوە نزیکەی 80 دۆنم پوش و پاوان سووتان.
لە راگەیەندراوێکی بەڕێوەبەرایەتیی پۆلیسی دارستان و ژینگەی سلێمانیدا هاتووە، “ئاگرێك لە سنووری گوندی کلکەسماق کەوتەوە و دەستبەجێ مەفرەزەیەك لە کارمەندانی بەشی پۆلیسی دارستان و ژینگەی دوکان، دەرچوون بەرەو شوێنی ئاگرەکە بەمەبەستی کوژاندنەوەی”.
ئاماژەی بەوەشکرد، لە ئەنجامدا بە هاوکاریی ئاگرکوژێنەوەی قەزای دوکان و هاوڵاتییانی سنوورەکە، توانرا ئاگرەکە کۆنترۆڵبکرێت و بکوژێندرێتەوە.
لە راگەیەندراوەکەدا ئەوەش هاتووە، بەهۆی ئاگرەکەوە، نزیکەی 80 دۆنم پوش و پاوان سووتان و سەدان داری سروشتی زیانیان پێگەیشت و، وەک بەڕێوەبەرایەتییەکە ئاماژەی پێکردووە، “گوماندەکرێت پاشماوەی ئاگری گەشتیاران هۆکار بێت بۆ دروستبوونی ئاگرەکە و لێکۆڵینەوە و بەدواداچوون لەوبارەیەوە، بەردەوامە”.
