شارەزایەکی بواری کەشناسی رایدەگەیەنێت، بەپێی ئاماژە سەرەتاییەکان، وەرزی دابارینی داهاتووی 2025-2026، ئاستی دابارین بە شێوەیەکی بەرچاو بەرزدەبێتەوە، مەترسیی وشکەساڵی نییە و دۆخەکە ئاسایی دەبێتەوە.
شاڵاو هیدایەت، شارەزای بواری کەشناسی بڵاویکردەوە، چەندین دەزگای نێودەوڵەتیی کەشناسی، ئاماژە بە باڵادەستبوون و چالاکیی فەیسی نیوتڕاڵ دەکەن بۆ وەرزەکانی هاوین و پایز، بەڕای زۆرینەی دەزگاکانیش، دیاردەی ئێل نینۆ دواتر روودەداتەوە، بەوپێیەش ئەگەری روودانی دیاردەی لانینا بۆ وەرزی دابارینی داهاتوو نییه.
ئاماژەی بەوەشکرد، لە سەرەتای پایزەوە، جیاوازیی وەرزەکە بەراورد بە پایزی ساڵی رابردوو بەدیدەکرێت و باشتر دەبێت، دواتر دۆخەکه بۆ ناو زستان و بەهار بەرەو باشیی زیاتر دەڕوات.
ئەوەشیخستەڕوو، بەپێی لێکدانەوەی خۆی و نەخشە باوەڕپێکراوە جیهانییەکان، لەڕووی دابارینەوە، پایزی ئەمساڵ لە پایزی ساڵی رابردوو باشتردەبێت و وەرزەکانی دیکەش، زۆر باشتر دەبن.
