بافڵ جەلال تاڵەبانی، سەرۆكی یەكێتیی نیشتمانیی كوردستان لە سلێمانی پێشوازی لە ئەندرۆ بیزلی، كونسوڵی گشتیی بەریتانیا لە هەرێمی كوردستان كرد.
لە دیدارێكدا پرسەكانی پەیوەست بە هەرێمی كوردستان و عێراق گفتوگۆیان لەبارەوەكرا و جەخت لە بەردەوامی پەیوەندی و لێكتێگەیشتنی نێوان لایەنەكان بۆ زاڵبوون بەسەر ئاڵنگارییەكاندا كرایەوە.
لە كۆبوونەوەكەدا باس لە پێكهێنانی كابینەی نوێی حكومەتی هەرێمی كوردستان كرا و سەرۆك بافڵ وتی، “دیدگای هاوبەشیی حكومڕانی داڕێژراوەتەوە كە دەبێتە بەرنامەی كاری كابینەی داهاتوو و هیوادارین وەفدی دانوستانكاری یەكێتی و پارتی لە گفتوگۆكانیان بۆ دابەشكردنی پۆستەكان بگەنە ئەنجام”.
هەڵبژاردنی ئەنجوومەنی نوێنەرانی عێراق تەوەرێكی دیكەی كۆبوونەوەكە بوو و هەردوولا جەختیان لە ئەنجامدانی هەڵبژاردنێكی پاك و بێگەرد كردەوە.
