سەرۆك وەزیرانی پێشووتری توركیا و سەرۆكی پارتی ئاییندە، رایدەگەیەنێت، هیوادارم كێشەی فڕۆكەخانەی سلێمانی بەزوویی چارەسەربكرێت و ئیشەڵڵا جاری داهاتوو لە فڕۆكەخانەی سلێمانی دادەبەزم.
ئەحمەد داود ئۆغڵو، سەرۆك وەزیرانی پێشووتری توركیا و سەرۆكی پارتی ئاییندە ئەمڕۆ یەكشەممە سەردانی شاری سلێمانی كرد و لە كۆنفرانسێكی رۆژنامەوانیدا رایگەیاند، هیوادارم كێشەی فڕۆكەخانەی سلێمانی بەزوویی چارەسەربكرێت پێویستە گەشتی راستەوخۆ لە نێوان سلێمانی و توركیادا هەبێت.
وتیشی، “ئەمە دووەمین سەردانمە بۆ سلێمانی، بێگومان بوونی پـ.ـەكـ.ـەكـ.ـە كاریگەریی نەرێنی هەبوو لەسەر پەیوەندییەكانی سلێمانی و توركیا، لەگەڵ ئەم پڕۆسە نوێیەدا فڕۆكەخانەی سلێمانی دەكرێتەوە و ئیشەڵڵا جاری داهاتوو لە فڕۆكەخانەی سلێمانی دادەبەزم”.
جێی ئاماژە بۆكردنە، ئەمڕۆ بە ئامادەبوونی ژمارەیەكی زۆر لە كەسایەتیی سیاسیی جیهان و عێراق و هەرێم یەكەمین كۆڕبەندی دێڵفی-سلێمانی بەڕێوەچوو.
