بەرپرسێکى پێشووى دارایى عێراق رایدەگەیەنێت، سەبارەت بە دواکەوتنى مووچە بە رەسمى هیچ هۆکارێک بە هەرێم رانەگەیەندراوە.
رێباز حەملان، بریکارى پێشووى وەزارەتى دارایى عێراق ئەمڕۆ لە لێدوانێکدا بۆ رۆژنامەنووسان رایگەیاند، وردبینى لە فەرمانگەى ژمێریاریی وەزارەتى دارایى عێراق تەواو بووە و، هیچ کێشەیەک لەسەر لیستى مووچەى هەرێم نەبووە.
باسى لەوەشکرد، بڕیاردان لەبارەى خەرجکردنى مووچەى مانگى چوارى مووچەخۆرانى هەرێم پێویستە لە ئەنجومەنى وەزیران بێت، نەک وەزارەتى دارایى، چونکە وەزیرى دارایى چاوەڕێى بڕیار و راسپاردەى سودانى-یە بۆ خەرجکردنى مووچەى مووچەخۆرانى هەرێم.
رێباز حەملان دەربارەى هۆکارى دواکەوتنى مووچەش باسى لەوەشکرد، تائێستا بە رەسمى حکومەتى عێراق هیچ هۆکارێکى قانونى و ئیدارى بە حکومەتى هەرێم رانەگەیاندووە.
دەربارەى ئەو دەنگۆیەى دەوترێت تەیف سامى بڕیارى وایە کە نزیکەى 760 ملیار دینار بۆ هەرێم رەوانە بکات، بریکارەکەى پێشووى دارایى وتى، “تائێستا هیچ شتێکى رەسمى لەوبارەیەوە نییە”.
