پارێزگاری هەڵەبجە بە وەكالەت، رایگەیاند، “گرنگە کەشی زیاتری ئازادی و مافی دەستگەیشتن بە زانیاری بۆ رۆژنامەنووسان فەراهەمبکرێت”.
نوخشە ناسیح، پارێزگاری هەڵەبجە بە وەكالەت، رایگەیاند، “لە ساڵیادی رۆژنامەگەریی کوردیدا، پیرۆزباییەکی گەرم لە رۆژنامەنووسانی كورد لە کوردستان و جیهان بە گشتی و پارێزگای هەڵەبجە بە تایبەتی دەکەین، کە لەکایەی میدیا و فراوانکردنی ئازادی و دیموکراسیدا دڵسۆزانە خزمەتیان كردووە”.
پارێزگاری هەڵەبجە دەڵێت، “میقداد مەدحەت بەردخان نووسەر و رووناکبیری کورد بە بڵاوکردنەوەی یەکەم رۆژنامەی کوردی بە ناوی (كوردستان) دەستپێکی قۆناغێکی نوێی لە مێژووی رووناکبیریی کوردی و سەرەتای رەوتی رۆژنامەگەریی کوردی دەستپێکرد”.
نوخشە ناسیح، ئەوەش دەڵێت، “لەم یادەدا بە گرنگی دەزانین، کەشی زیاتری ئازادی و دیموکراسی و مافی دەستگەیشتن بە زانیاری بۆ رۆژنامەنووسان فەراهەمبکرێت، لەبەرامبەریشدا رۆژنامەنووسان بە بەرپرسیارێتیی زیاترەوە کاری رۆژنامەوانی جێبەجێبکەن لەپێناو گەیاندنی زانیاری و بڵاوکردنەوەی هۆشیاری بۆ کۆمەڵگە و پەرەپێدان بە توانا پیشەییەکانی خۆیان و پابەندبوونیان بە بەها باڵاکانی رۆژنامەگەری، و ئاستی متمانە بە کاری رۆژنامەگەری لەناو کۆمەڵگادا بەرزبکەنەوە”.
