وتەبێژی پۆلیسی دهۆک ڕایگەیاند، دوای ئەوەی شەش جار تۆمەتبارێک لەلایەن دادگاوە داواکرابوو خۆی ڕادەست نەدەکرد و دووجار تەقەی لە پۆلیس کردووە و دوو ئەندامی هێزە ئەمنییەکانی بریندارکردووە، بۆیە بە ناچاری شەوی ڕابردوو تەقەی لێکرا و کوژرا.
هێمن سلێمان، وتەبێژی پۆلیسی پارێزگای دهۆک لە لێدوانێکی ڕۆژنامەوانیدا ئەمڕۆ 26 ی تشرینی یەکەم ڕایگەیاند، “دوای ئەوەی زانیاری کۆکرایەوە لەسەر تۆمەتبارێک کە شەش جار بڕیاری دادگای هەبوو بۆ ئامادەبوون لەبەردەم دادگا، بەڵام خۆی ڕادەست نەکردووە و تەقەی لە پۆلیس کردووە، بۆیە پۆلیس چووەتە سەر شوێنەکەی کە بەنزین خانەیەک بووە”.
وتەبێژی پۆلیسی دهۆک ئاشکرایکرد، “تۆمەتبارەکە پێشتر تەقەی لە پۆلیسێک کردبوو و برینداری کردبوو، شەوی ڕابردووش کە پۆلیس چووەتە شوێنی تۆمەتبارەکە خۆی بە دەستەوە نەداوە و دیسانەوە تەقەی لە پۆلیس کردووە و موقەدەمێکی پۆلیسی بریندار کردووە و پاشان تەقەی لێکراوە و کوژراوە”.
پۆلیسی دهۆک ڕایگەیاندووە، لەناو ئۆتۆمبیلەکەی تۆمەتبارەکەدا دەستگیراوە بەسەر چەند نارنجۆکێک و چەکێکی جۆری قەناس و دەمانچەیەک و کڵاشنکۆفێک و تاپڕێکدا.
