بەڕێوەبەری راگەیاندن لە شارەوانیی سلێمانی رێكارەكانی سوودمەندبوونی مامۆستایان و فەرمانبەران لە وەرگرتنی زەوی رووندەكاتەوە و دەڵێت، “هەر مامۆستا و فەرمانبەرێك پێشتر سوودمەند نەبووبێت و نۆ ساڵ خزمەتی هەبێت زەوی پێدەدرێت”.
زەردەشت رەفیق، بەڕێوەبەری راگەیاندن لە سەرۆكایەتیی شارەوانیی سلێمانی لە لێدوانێكدا بە تۆڕی میدیایی ئێستای راگەیاند، ئەو فەرمانبەرانەی ناویان بۆ وەرگرتنی زەوی هاتووەتەوە سەرەتا لە فەرمانگەكانی خۆیانەوە ناوەكانیان دەنێردرێت بۆ بەڕێوەبەرایەتیی تۆماری خانووبەرە و ئەگەر سوودمەندنەبوو ئەوا زەوییان پێدەدرێت.
وتیشی، “بەپێی رێنماییەكان فەرمانبەران دەبێت لە نۆ ساڵ كەمتر خزمەتیان نەبێت و ئەو كات سوودمەنددەبن لە وەرگرتنی زەوی لەو سێ شوێنەی كە پێشتر دیاریكراوە”.
