ئەمریكا لەبارەی خۆپیشاندانەكانی توركیا و ئەو ئاڵۆزیانەی بەهۆی دەستگیركردنی سەرۆكی گەورە شارەوانی ئیستانبوڵەوە دروستبوون؛ هەڵوێستی خۆی ئاشكراكرد.
ماركۆ روبیۆ، وەزیری دەرەوەی ئەمریكا لە كۆنگرەیەكی رۆژنامەوانیدا رایگەیاند، واشنتن دەیەوێت تەواوی وڵاتانی جیهان لە ئارامی و بێكێشەییدا بژین و هیچكات ناویەوێت ئاڵۆزی لە هیچ وڵاتێكدا رووبدات.
وتیشی، “دەستگیركردنی خپیشاندەران نیگەرانی كردووین و ئاڵۆزییەكانیش بەهەمان شێوە، بۆیە دەبێت كێشەكان دوور لە ئاڵۆزی چارەسەر بكرێن”.
ئەكرەم ئیمامئۆغڵو، سەرۆكی گەورەشارەوانیی ئیستانبوڵ بە تۆمەتی گەندەڵی و پاڵپشتیكردنی رێكخراوی تیرۆریستی، كە گەورەترین ركابەری رەجەب تەیب ئەردۆغان، سەرۆككۆماری توركیایە؛ دەستگیركرا و سزای زیندانیكردنی بەسەردا سەپێندرا و بەهۆیەشەوە خۆپیشاندانەكان لە سەرتاسەری توركیا دەستیانپێكرد و تاوەكو ئێستاش سەدان كەس دەستگیركراون.
