جێگرى سەرۆک وەزیرانى هەرێم رایدەگەیەنێت، زامی هەڵەبجە و ئەنفال و ئازارەکانی دیکە تەنها یادکردنەوەیەکی سادە نین، بەڵکو بۆنەیەکن بۆ بیرکردنەوە لەبوونمان و مێژوومان.
قوباد تاڵەبانى، جێگرى سەرۆک وەزیرانى هەرێم لە پەیامێکدا رایگەیاند، یادکردنەوەی زامی هەڵەبجە و ئەنفال و ئازارەکانی دیکە تەنها یادکردنەوەیەکی سادە نین، بەڵکو بۆنەیەکن بۆ بیرکردنەوە لەبوونمان و مێژوومان. بۆنەیەکن بۆ تێڕامان لەو کارەسات و نەهامەتییانەی بەسەر میلەتەکەماندا هاتووە و بۆنەیەکیشن بۆ تێگەیشتن لە هاوچارەنوسیمان وەک گەلی کورد بەبێ جیاوازی.
قوباد تاڵەبانى دەشڵێت، لە یادی 37 ساڵەی کیمیابارانی هەڵەبجەدا، سەری رێز دادەنوێنین لە ئاست هەموو شەهیدانی کیمیاباران و کەسوکاری سەربەرزیان.
ئەمڕۆ 37 ساڵ بەسەر کیمیابارانکردنی شاری هەڵەبجە لەلایەن رژێمی پێشووی عێراقەوە تێدەپەڕێت کە بەهۆیەوە پێنج هەزار کەس گیانیان لەدەستدا و هەزارانی دیکەش برینداربوون.
