مەكتەبی سیاسی یەكێتیی نیشتمانیی كوردستان بەبۆنەی هەشتی مارس پەیامێكیی بڵاوكردەوە و رایگەیاند،”یەكێتیی نیشتمانیی كوردستان وەك هەمیشە پشتیوانی بۆ خەباتی ژنان دووپاتدەكاتەوە، بەكردەوەش لەسەر رێبازەكەی سەرۆك مام جەلال بواری تێكۆشانی لە بواری حزبی و حكومیدا بۆ رەخساندوون”.
دەقی پەیامەكەی مەكتەبی سیاسی:
لە رۆژی هەشتی مارس، رۆژی جیهانیی جۆشدانی بزووتنەوەی ژناندا پیرۆزبایی گەرم لە گشت ژنانی كوردستان و جیهان دەكەین.
جوڵانەوەی ماف و یەكسانیخوازیی ژنان بەشێكی سەرەكی و جەوهەری خەباتی دیموكراتی و تێكۆشانی كۆمەڵایەتی میللەتانن و هەر پێشكەوتنێك لەم جوڵانەوەیەدا خەرمان و خەزینی تێكۆشانی جیهانی دەوڵەمەند دەكەن.
یەكێتیی نیشتمانیی كوردستان وەك هەمیشە پشتیوانی بۆ خەباتی ژنان دووپاتدەكاتەوە، بەكردەوەش لەسەر رێبازەكەی سەرۆك مام جەلال بواری تێكۆشانی لە بواری حزبی و حكومیدا بۆ رەخساندوون و هەوڵەكانیشمان بەردەوامە بۆ بەرفراوانتركردنی بەشدارییان لە بڕیار و دارشتنی سیاسەتدا.
هەر بەم بۆنەیەشەوە بە تایبەتی پیرۆزبایی لە هەڤاڵانی ژن و كچانی ریزەكانی یەكێتی دەكەین كە هاوبەشێكی سەرەكیی رەوتی خەباتی هەمەلایەنەی حزبەكەیانن و پێشمانوایە ژنانی یەكێتیی باشترین و چالاكترینی ژنانی كایەی سیاسی و گشتین لە كوردستاندا.
درود بۆ رۆحی ئەو ژنانە دەنێرین كە لە تێكۆشانی سیاسی و رێكخراوەییدا وەك تەواری بەرزەفڕ و هێمای ئازایەتیی سەرقافڵەی داكۆكیكاری توێژەكەیان بوون.
مەكتەبی سیاسی
یەكێتیی نیشتمانیی كوردستان
