بریکاری وەزارەتی نەوتی عێراق رایگەیاند، “هەرێمی کوردستان خاوەنی یەدەگێکی گەورەی گازی سروشتییە و باشترین جۆری گازی هەیە”.
عیزەت سابیر بریکاری وەزارەتی نەوتی عێراق رایگەیاند، لە ئێستادا سەرقاڵی ئامادەکاریین بۆ دۆزینەوەی جێگرەوەی گازی ئێران و ئەگەر پێویستی کرد لە وڵاتی قەتەرەوە گازی سروشتی هاوردە دەکەین، چونکە نزیکترین شوێنە لە عێراقەوە.
وتیشی، “هەرێمی کوردستان یەدەگێکی گەورەی گازی سروشتی هەیە و خاوەنی باشترین جۆرەکانی گازە، بۆیە هیوادارم لە خزمەتی هاوڵاتییاندا کاری تێدابکرێت، بۆ نموونە: کێڵگەی چەمچەماڵ گەورەترین و خاوێنترین کێڵگەی گازی سروشتییە لە عێراقدا، بەجۆرێک کە %97ـی گازەکەی خاوێنە و راستەوخۆ سوودی لێدەبینرێت”.
ئاماژەی بەوەشدا، %45ـی کارەبای عێراق لەرێگای گازەوە بەرهەمدەهێندرێت و وڵاتەکە دەتوانێت تاوەکو 100 ساڵی دیکە سوود لە گاز وەربگرێت.
ئەوەشی خستەڕوو، کێشەی کارەبا لە عێراقدا و دابیننەکردنی کارەبای 24 کاتژمێری، پێویستی بە دووبارە رێکخستنەوە هەیە، چارەسەرکردنیشی پەیوەندیی بە حکومەت و هاوڵاتیانەوە هەیە و دەبێت خواست و بەکارهێنانی باشتر بکەن نەک بەرهەمهێنانی.
