حەیان عەبدولغەنی، وەزیری نەوتی عێراق رایگەیاند، لەگەڵ هەرێمی کوردستان رێککەوتووین بۆ بەگەڕخستنەوەی بۆریی بەندەری جەیهانی تورکیا.
عەبدولغەنی لە لێدوانێکدا رایگەیاند، “زنجیرەیەک کۆبوونەوەمان لەگەڵ وەزارەتی سامانە سروشتییەکانی حکومەتی هەرێمی کوردستان ئەنجامداوە و لێکتێگەیشتنی گرنگ لەنێوانمان هەیە”.
ئاماژەی بەوەشکرد، گەیشتوینەتە رێککەوتنێک کە گەرەنتیی کاری هاوبەش دەکات بۆ بەگەڕخستنەوەی بۆریی بەندەری جەیهانی تورکیا.
رۆژی دووشەممە 24ـی شوبات، ئاسۆ فەرەیدون، ئەندامی لیژنەی نەوت و گاز لە ئەنجومەنی نوێنەرانی عێراق بە تۆڕی میدیایی ئێستای راگەیاند، وەزارەتی نەوتی عێراق، بە نامەیەک لایەنی تورکیای ئاگادارکردووەتەوە لە رێککەوتنیان لەگەڵ هەرێم سەبارەت بە هەناردەکردنەوەی نەوت.
