ئەحمەد میرە رۆژنامەنووس و مامۆستای زانکۆ رایگەیاند، کاتێک سودفەیەکی سیاسیی پیاوێکی رەزاگران دەکاتە پارێزگاری پایتەخت، ناچار دەبیت هاوار بکەیت و بە روونی پێیبڵێیت، رەزاگران هێندە رەفتار و بیرت ناشیرینە، مرۆڤ دەبێت غیرەتێکی زۆری هەبێت تا تەماشای ناخی پڕ داماوی و هەستی خۆبەکەمزانینی بکات.
ئەحمەد میرە لە وەڵامی لێدوانێکی ئومێد خۆشناو پارێزگاری هەولێر کە خۆپیشاندەرانی بە رەزاقورس ناوبردبوو نووسیویەتی، “بە سروشت خۆشیم بە مرۆڤی گرنگ و ئاوەز قەزەمی نایەت، زۆر جاریش کاڵفامەکان دەسپێرم بە قەدەری داماوی خۆیان و نامەوێت لەسەر رەفتار و بیری تاریک و تەسکیان وشەکانم بەفیڕۆ بدەم، بەڵام کاتێک سودفەیەکی سیاسیی پیاوێکی رەزاگران دەکاتە پارێزگاری پایتەخت، ناچار دەبیت هاوار بکەیت و بە روونی پێیبڵێیت “رەزاگران هێندە ڕەفتار و بیرت ناشیرینە ؛مرۆڤ دەبێت غیرەتێکی زۆری هەبێت تا تەماشای ناخی پڕ داماوی و هەستی خۆبەکەمزانینی تۆ بکات”.
ئەحمەد میرە باسیلەوەکردووە، لە ڕاستیدا ئێمە بێتاقەتین کە تۆیەکی ساختە، پارێزگاری پایتەختمان بیت و لەسەر عەرشی هەولێری مەزن دانیشیت، تەنانەت لە ناوخۆی حیزبەکەشتا رێزلێگیراونیت، دەترسم بیرت چووبێتەوە کە پاسەوانەکانی کوڕی ئاغای گەورەت، بە پاڵ دوورت دەخەنەوە، دڵتەنگم هەولێر بەو هەموو مرۆڤە جوان و مێژووە پڕشکۆیە وە تۆ پارێزگاری بیت.
لە بەشێکی دیکەی نووسینەکەشیدا ئاماژەی بەوەشکرد، کاتێک ئەم وشانە دەنووسم خەمبارم کە رەفتار و بیری تۆ، بە جۆرێک خراپ و ڕەشە، ڕێگەمان پێدەدات لایەک لەم جۆرە دەربڕینانە بکەینەوە، دەنا تۆ لە فەرهەنگی وشە و گەنجینەی بیرماندا بەهادارنیت تا کات و دەربڕینەکانمانی بۆ بە هەدەربدەین، رەزاگران تۆ و هاوبیرەکانتن کە بە هەموو شتێکی خراپ رازی و قانیعن و مێش میوانی دڵ و بێبیریتان نییە، رەزاگران تۆیت هەمیشە لە هەردوو بەری جۆگەی شەرمەزاری دەخۆیت، ڕەزاگران تۆیت بەردەوام بالۆرەی نەهامەتی لێدەدەیت.
