ئەمڕۆ ئەنجومەنی وەزیرانی هەرێم كۆبوونەوەی نائاسایی خۆی ئەنجامدا و بڕیاردرا وەفدێك لە نوێنەرانی هەرێمی كوردستان لە بەغداد، لەگەڵ سەرۆك وەزیرانی عێراق كۆببێتەوە و پەیامی هەرێمی كوردستانی پێبگەیەنن كە پێویستە وەك قەوارەیەكی فیدراڵی و دەستووریی مامەڵە لەگەڵ هەرێمی كوردستان بكرێت و بۆ ساڵی 2025 كێشەی مووچە چارەسەربكرێت.
بەپێی راگەیەندراوێكی ئەنجومەنی وەزیرانی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ شەممە ئەنجومەنی وەزیرانی هەرێمی كوردستان كۆبوونەوەیەكی نائاسایی خۆی تایبەت بە ماف و شایستە داراییەكانی هەرێم لە بەغداد، بە بەشداریی نوێنەرانی هەرێمی كوردستان لە حكومەتی عێراق و ئەنجومەنی نوێنەرانی عێراق ئەنجامدا.
لە راگەیەندراوەكەدا هاتووە، لە كۆبوونەوەدا بڕیاردرا حكومەتی هەرێمی كوردستان و نوێنەرانی هەرێمی كوردستان لە حكومەتی عێراق بەشێوەیەكی هاوبەش كار بۆ دابینكردنی مووچەی تەواوی مووچەخۆرانی هەرێمی كوردستان بۆ هەر دوازدە مانگی ساڵی 2025 بكەن و بۆ ئەم مەبەستەش، بڕیاردرا وەفدێك لە نوێنەرانی هەرێمی كوردستان لە بەغداد، لەگەڵ سەرۆك وەزیرانی عێراق كۆببێتەوە و پەیامی هەرێمی كوردستانی پێبگەیەنن كە پێویستە وەك قەوارەیەكی فیدراڵی و دەستووریی مامەڵە لەگەڵ هەرێمی كوردستان بكرێت و بۆ ساڵی 2025 كێشەی مووچە چارەسەربكرێت.
هەر لە راگەیەندراوەكەدا هاتووە، بڕیاردرا وەزارەتی دارایی و ئابووریی هەرێمی كوردستان، دەبێت بەشداربێت لە پڕۆسەی پێداچوونەوە بە بەشی هەرێمی كوردستان لە خشتەی پێشنیازكراوی خەرجییەكانی مووچە و خەرجییەكانی بەكاربردن و پڕۆژەكانی بودجەی وەبەرهێنان و بودجەی پەرەپێدانی هەرێم و پارێزگاكان و خشتەكانی سەرجەم شایستەكانی ساڵی دارایی 2025 بە هاوبەشی لە نێوان هەردوو وەزارەتی دارایی هەرێم و عێراق ئامادە بكرێت، بە تایبەتی بۆ بەشی هەرێم و شایستەكانی و پلەی وەزیفی و میلاك بە گوێرەی دەستوور و بڕیاری دادگای باڵای فیدڕاڵی.
بڕیاریش دراوە لە لە ئێستاوە كار بكرێت لە یاسای بودجەی فیدراڵ، بەشی هەرێمی كوردستان لە بودجە دیاریبكرێت لەسەر بنەمای ڕێژەی دانیشتووانی هەرێم بە پێی سەرژمێریی گشتیی ساڵی رابردوو و پێوەرە دەستوورییەكانی دادپەروەریی لە دەستنیشانكردنی بەشی هەرێم لە بودجە وەك قەوارەیەكی فیدڕاڵی.
