ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، لە كۆبوونەوەی ئەمڕۆی نێوان وەزیری دارایی عێراق و لیژنەی دارایی پەرلەماندا بڕیاری پێكهێنانی لیژنەیەك بۆ بەدواداچوونی مووچەی مانگی 12ی ساڵی رابردوودا درا.
د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق رایگەیاند، ئەمڕۆ لیژنەی دارایی لە ئەنجومەنی نوێنەرانی عێراق لەگەڵ تەیف سامی وەزیری دارایی عێراق كۆبوونەوە و لە كۆبوونەوەكەدا باس لە پرسی دەستپێكردنەوەی هەناردەی نەوتی هەرێم و هەمواری یاسای بودجە و كێشەی مووچە و كێشە داراییەكانی نێوان هەرێم و بەغداد كران.
وتیشی، “لە كۆبوونەوەكەدا بڕیاردرا بە پێكهێنانی لیژنەیەك لە ئەندامانی لیژنەی دارایی بۆ بەدواداچوونی مووچەی مانگی 12ی ساڵی رابردووی فەرمانبەرانی هەرێمی كوردستان”.
