سەرۆکی شارەوانیی سلێمانی بەدواداچوون بۆ کاری لیژنەی دابەشکردنی زەوی بەسەر فەرمانبەراندا دەکات.
سەرۆکایەتیی شارەوانیی سلێمانی لە راگەیەندراوێکدا بڵاویکردەوە، بەیانیی ئەمڕۆ بەسەرپەرشتیی لەیلا عومەر، سەرۆکی شارەوانیی سلێمانی و بە ئامادەبوونی لیژنەی دابەشکردنی زەوی، کۆبوونەوەیەک بۆ تاوتوێکردنی کارەکانی لیژنەی دابەشکردنی زەوی بەسەر فەرمانبەراندا ئەنجامدرا.
باس لەوەش دەکات، هەروەها گفتوگۆکرا دەربارەی دۆزینەوەی رێگاچارە بۆ ئەو کێشە و گرفتانەی ئێستا هەن لە پرۆسەکەدا، ئەوەش بەهۆی زۆریی داواکاریی فەرمانبەرانی وەزارەتە جیاوازەکانی دەرەوەی وەزارەتی شارەوانی و گەشتوگوزار.
بەپێی راگەیەندراوەکە، هەر لە میانەی کۆنوونەوەکەدا گفتوگۆکرا لەسەر سەرجەمی ئەو وەزارەتانەی کە ناوی فەرمانبەرانیان نەگەڕاوەتەوە لە ئەنجومەنی وەزیران، بۆیە هەر کات نووسراوی هەرسێ بەڕێوەبەرایەتیی (تۆمارکردنی خانووبەرەی یەک و دوو و بەڕێوەبەرایەتیی گشتیی شارەوانییەکان) گەڕانەوە کە لە لایەن خۆیانەوە تەواودەکرێت و هەر کاتێک ئاراستەی سەرۆکایەتیی شارەوانیی سلێمانی کرا کاری یاساییان بۆ ئەنجامدەدرێت و بەزووترین کات زەوییان بەسەردا دابەشدەکرێت.
