لە كۆبوونەوەیەكی تایبەتدا كە لەنێوان بەرپرسانی سوریا و سەرۆك وەزیرانی پێشوو، و سەرۆكی گروپە چەكدارەكان بەرێوەچوو، بڕیاردرا بە دانانی محەمەد بەشیر بۆ پۆستی سەرۆك وەزیرانی سوریا بە شێوەیەكی كاتی.
لە درێژەی كۆبوونەوەكەدا جەخت لەسەر پاراستنی ئارامیی ناوچەكە و پاراستنی دامودەزگاكانی دەوڵەت كراوەتەوە و هەروەها، محەمەد بەشیر، وەك سەرۆك وەزیرانی كاتیی سوریا راسپێردراوە تاوەكو تێپەڕاندنی بارودۆخی وڵاتەكە و دانانی سەرۆك وەزیرانێكی دیكە.
محەمەد بەشیر لەدایكبووی ساڵی 1983یە، دوو بەكالۆریۆسی زانستی هەیە، یەكەمیان لە بواری ئەندازیاری كارەبادا هەیە لە زانكۆی حەلەب و دووەمیشیان، لە بواری زانستە ئیسلامییەكاندایە كە لە ماوەی رابردووشدا، ناوبراو وەزیری گەشەپێدان و كاروباری مرۆیی بووە لە پارێزگای ئێدلب.
ئەمە لەكاتێكدایە، لەچەند هەفتەی رابردودا گرژی و ئاڵۆزی لە نێوان گروپە چەكدارەكانی سوریا و حكومەت روویدا و گروپە چەكدارەكان كۆنتڕۆڵی ناوچەكانی ژێر دەسەڵاتی حكومەتییان كرد و رووخانی رژێمی ئەسەدییان راگەیاند، لەئێستاشدا لە هەوڵی پێكهێنانی كابینەی نوێی حكومەتن لە وڵاتدا.
