وتەبێژی زانکۆی سلێمانی رایگەیاند، 116 مامۆستای وانەبێژ لە زانکۆکەیان دەکرێن بە گرێبەست.
یۆهان عوسمان، وتەبێژی زانکۆی سلێمانی بە تۆڕی میدیایی ئێستای راگەیاند، لە زانکۆکەیان 116 مامۆستای وانەبێژ لە هەردوو رەگەز لە بڕیاری بە گرێبەستبوون سوودمەند دەبن.
وتیشی، ئەو 116 کەسە سەرجەم مەرجەکانی بوون بە گرێبەستیان تێدایە.
لەبارەی بڕی مووچەی وانەبێژانی گرێبەست، یۆهان عوسمان رایگەیاند، “وردەکاریی ئەو بابەتە پەیوەستە بە ئەنجومەنی وەزیرانەوە و ئێمە تەنها رێکارەکانی ئامادەکردنی لیستی ناوەکان ئەنجامدەدەین”.
رۆژی 2ی تشرینی یەکەمی 2024، ئەنجومەنی وەزیرانی هەرێم بڕیاریدا سەرجەم مامۆستایانی وانەبێژی خوێندنی باڵا بکرێن بە گرێبەست.
پێشتر عەباس ئەکرەم، وتەبێژی وەزارەتی خوێندنی باڵا و توێژینەوەی زانستیی هەرێم بە تۆڕی میدیایی ئێستای راگەیاند، “بڕیارەكە سەرجەم وانەبێژان لە ساڵی 2014ەوە تاوەکو ئەمساڵ دەگرێتەوە، بەپێچەوانەی ئەوەی پێشووتر دەوترا تەنها تایبەت دەبێت بە وانەبێژانی ساڵانی 2023/ 2024، بەڵكو بە هەوڵی وەزیری خوێندنی باڵا سەرجەم وانەبێژان دەگرێتەوە و رێكارەكان دەچنە بواری جێبەجێكردنەوە”.
