ئەمڕۆ ئەنجومەنی نوێنەران کۆدەبێتەوە و ئەو سێ یاسایەی کە ماوەیەکە بەهۆی ناکۆکی لەنێوان لایەنەکانی شیعە و سوننە و کورد یەکلایینەکرابوونەوە، پەسەنددەکات.
بەپێی کارنامەی کۆبوونەوەی ئەمڕۆی ئەنجومەنی نوێنەران، دەنگ لەسەر هەمواری یاسای باری کەسێتیی عێراق دەدرێت و بڕگەی هەڵوەشاندنەوەی بڕیارەكانی سەردەمی رژێمی پێشوو دەدرێت کە پەیوەستە بە تەعریب لە كەركوك و دەوروبەری و گێڕانەوەی زەوییەكان بۆ خاوەنەکانیان کە كورد و توركمانەكانن.
هەر بەپێی کارنامەی کۆبوونەوەکە، هەر ئەمڕۆ دەنگ لەسەر هەمواری دووەمی یاسای لێبوردنی گشتی دەدرێت.
رۆژی یەکشەممەی رابردووش دانیشتنی ئەنجومەنی نوێنەران بۆ هەمان مەبەست رێکخرابوون، بەڵام بەهۆی ناکۆکی لایەنەکان دواخرا.
