لە بازاڕە جیهانییەکاندا، ئەمڕۆ یەکشەممە نرخی نەوت و زێڕ لە بەرزیدا ماونەتەوە، هەڵبژاردنی سەرۆکایەتیی ئەمریکا و گرژییەکانی رۆژهەڵاتی ناوەڕاست و دۆخی دەریای سوور وەک هۆکارەکان بۆ بەرزی نرخەکان تەماشادەکرێن.
بەرمیلێک نەوتی خاوی برێنت لە بازاڕە جیهانییەکان، بە 76 دۆلار مامەڵەی پێوەدەکرێت، بەرمیلێک نەوتی خاوی ئەمریکیش بەرامبەر بە 71 دۆلار و 78 سەنتە.
لەلایەکی دیکەشەوە، نرخی ئۆنسەیەک زێر هاوتای دوو هەزار و 748 دۆلاری ئەمریکییە و کیلۆیەکی کانزاکەش هاوتای 88 هەزار و 352 دۆلاری ئەمریکییە.
هەڵبژاردنەکانی ئەمریکا کاریگەریی بەرچاوی هەیە و دەبێت لەسەر نرخی نەوت بەهۆی ئەوەی، لە ئەگەری دەرچوونی هەر یەکێک لە کاندیدەکان چاوەڕوانی گۆڕانکاری لە سیاسەتی دەرەوەی ئەمریکا دەکرێت، جگە لە سیاسەتەکانی بانکی فیدڕاڵیی ئەمریکا.
لەلایەکی دیکەوە، هێرش و کێشمەکێشمەکانی رۆژهەڵاتی ناوەڕاست بەردەوامییان هەیە و ئابووریناسان ترسیان هەیە لە پەککەوتنی رێگاکانی گواستنەوەی نەوت و خواست لەسەر کڕینی زێڕ بەرزبووەتەوە.
