وەزیرى بەرگریی پاکستان داواى یەکگرتن لە وڵاتانى ئیسلامى دەکات و پاڵپشتیی وڵاتەکەشى بۆ ئێرانیش نیشاندەدات
خواجە ئاسف، وەزیری بەرگریی پاکستان هۆشداریدا لەوەى گەر “جیهانى ئیسلامى یەکنەگرن”، هەمووان تووشى هەمان چارەنووسى یەمەن و ئێران دەبنەوە.
وەزیرەکەى پاکستان پاڵپشتیی وڵاتەکەشى بۆ ئێران دووپاتدەکاتەوە و وتى، “بە هەموو هێزمانەوە پاڵپشتیی ئێران دەکەین”.
بەرەبەیانى دوێنێ ئیسرائیل هێرشێکى چڕوپڕى بۆ سەر تاران و ژمارەیەک شار و ناوچەى دیکەى ئێران ئەنجامدا و بەهۆیەوە چەندین سەرکردەى سەربازى و زاناى ئەتۆمى کوژران، جگە لە تێکدانى ژێرخانى سەربازى و ئەتۆمى.
شەوى رابردووش ئێران بە هێرشێکى هاوشێوە وەڵامى ئیسرائیلى دایەوە و چەندین ناوچەى لە تەلئەبیب و شارەکانى دەوروبەر کردە ئامانج.
دواتریش هەردوولا بەشێوەى جۆراوجۆر هێرش و پەلاماردانیان بۆسەر یەکتر درێژەپێدا.
