وتەبێژی کۆمسیۆنی باڵای سەربەخۆی هەڵبژاردنەکانی عێراق دەنگۆی دەنگدانی پێشوەختەی رەتکردەوە و دەڵێت، ”ئەو ئامێر و پێداویستیانەی تایبەتن بە رۆژی دەنگدان لە کۆگاکاندایە و پارێزراون”.
جومانە غەلای، وتەبێژی کۆمسیۆنی باڵای سەربەخۆی هەڵبژاردنەکانی عێراق، لەبارەی بڵاوکردنەوەی دەنگۆی دەنگدانی پێشوەختە ئاماژەی بەوەکرد، ”بە هیچ شێوەیەک دەنگدانی پێشوەختە بۆ هەڵبژاردنی خولی شەشەمی پەرلەمانی کوردستان ئەنجامنەدراوە و تاقیکردنەوەش نەکراوە”.
جەختی لەوەش کردەوە، ”ئەو ئامێر و پێداویستیانەی تایبەتن بە رۆژی دەنگدان لە کۆگاکاندایە و پارێزراون و بە هیچ شێوەیەک بەکارناهێندرێن”.
پێشتر لە تۆڕە کۆمەڵایەتییەکان ڤیدیۆیەک بڵاوکرایەوە کە گوایە بەشێک لە کارمەندانی هێزە ئەمنییەکان پێش کاتی دیاریکراوی خۆی بۆ هەڵبژاردنی خولی شەشەمی پەرلەمانی کوردستان دەنگیان داوە.
