وتەبێژی وەزارەتی دارایی رایگەیاند، چاوەڕوانن لە چەند رۆژی داهاتوودا ئەو لێبڕینانەی لە رابردوودا کرابوون بگەڕێندرێنەوە و لیستی مووچە رابگەیەنین.
هونەر جەمال وتەبێژی وەزارەتی دارایی و ئابووری هەرێم لە کۆنگرەیەکی رۆژنامەوانیدا رایگەیاند، لە مانگی حەوتەوە بە تەواوی کێشە بۆ دابەشکردنی مووچە دروستبووە و وەزارەتی دارایی عێراق هەستا بە بڕینی مووچەی کۆمەڵێک چین و توێژ و لەو مانگەدا زیادتر لە 600 ملیار دیناری لێبڕیوین.
ئاماژەی بەوەشکرد، چەند هەفتەی رابردوو بەشێک لەو پارە بڕاوە خەرجکراوە و ئێستا بەشێکی ماوەتەوە، کە بەڵێنی خەرجکردنی دراوە.
ئاشکراشیکرد، بڕیاربوو لەم چەند رۆژەدا ئەو لێبڕینانەی لە پێشوودا کرابوون بگەڕێندرێنەوە تا بتوانین ئەو لێبڕینانەی کە هەیە پڕیبکەینەوە و لیستی مووچەی مانگی نۆ رابگەیەنین.
