بەشی پێشبینیی بەڕێوەبەرایەتیی گشتیی کەشناسی و بوومەلەرزەزانیی هەرێم کەشوهەوای 48 کاتژمێری داهاتووی بڵاوکردەوە و ئاماژە بەوە دەکات، ئەمڕۆ باران دەبارێت و سبەینێ ئاسمان لە نێوان نیمچەهەور و پەڵەهەوردا دەبێت.
لەبارەی کەشوهەوای ئەمڕۆوە کەشناسیی هەرێم دەڵێت، ”ئاسمان نیمچەهەور دەبێت و لە ناوچە شاخاوییەکان بۆ هەوری تەواو دەگۆرێت، لەدوای نیوەڕۆدا لەناوچەکانی دهۆک و ناوچە شاخاوییەکانی هەولێر و هەندێک لە ناوچە سنووریەکانی سلێمانی پێشبینی نمەباران و تاوەباران دەکرێت، هاوکات پلەکانی گەرما بە شێوەیەکی گشتی نزیک دەبنەوە لە تۆمارکراوەکانی دوێنێ و تەنها لە ناوچە شاخاوییەکان بەتایبەتی لە ناوچە سنووریەکان نزمتر دەبنەوە”.
سەبارەت بە کەشوهەوای سبەینێ ئاماژەی بەوە کردووە، ”ئاسمان لەنێوان نیمچەهەور و پەڵەهەوردا دەبێت و پلەکانی گەرما بە گشتی کەمێک بەرزتر دەبنەوە و تەنها لە سنووری ناوچەکانی دهۆک نزیک دەبنەوە لە تۆمارکراوەکانی ئەمڕۆ”.
