وەزارەتی دارایی هەرێم رەتیدەكاتەوە پەیوەندی بە پرۆسەی دابەشكردنی زەوی بەسەر مووچەخۆراندا هەبێت.
وەزارەتی دارایی و ئابوریی هەرێم لە راگەیەندراوێكدا دەڵێت، سەبارەت بە دابەشکردنی فۆڕمی زەوی بۆ فەرمانبەران و مووچەخۆرانی تایبەت بە رێکخراوەکان، ئەو دەنگۆیانە رەتدەکەینەوە کە دەڵێن وەزارەتی دارایی و ئابوری رێگرە لە پێدانی فۆڕمی زەوی بەو فەرمانبەر و مووچەخۆرانە.
لە راگەیەندراوەكەدا بە سێ خاڵ چەند روونكردنەوەیەكی دیكەی داوە:
1- وەزارەتی دارایی و ئابوری هیچ پەیوەندییەکی بە پێدانی فۆڕم و دابەشکردنی زەوی بەسەر فەرمانبەران و مووچەخۆراندا نییە و دوور و نزیک ئێمە بەشێک نین لەو بابەتە.
2- هەموو ئەو رێنمایی و رێکار و خاڵبەندییانەی بۆ پێدانی زەوی بۆ فەرمانبەران و خانەنشینان و تەواوی چین و توێژەکان دیاریکراوە لە تایبەتمەندی و دەسەڵاتی وەزارەتی شارەوانی و گەشتوگوزاری هەرێمی کوردستانە.
3- ئەو کەس و لایەنانەی وەزارەتی داراییان بە رێگری لە پێدانی فۆڕمی دابەشکردنی زەوی بەسەر فەرمانبەران و مووچەخۆرانی رێکخراوەکان تۆمەتبار کردووە، هیچ زانیارییەكیان لەبارەی رێكار و شێوازی دابەشكردنی فۆڕمی زەوی بەسەر فەرمانبەراندا نییە و راستگۆ نەبوون.
