ئاسۆ مامەند سەرپەرشتیاری رێکخستنەکانی کەرکوک و سەڵاحەدینی یەکێتی رایگەیاند، جەخت لە پاراستنی ئاسایش و ئۆقرەیی بۆ دانیشتووانی کەرکوک و داوایشیکرد بەبۆنەی هەڵبژاردنی رێبوار تەها وەک پارێزگاری کەرکوک هیچ ئاهەنگێک سازنەکرێت.
ئاسۆ مامەند لە راگەیەندراوێکدا بڵاویکردەوە، دەرچوواندنی مەرسومی کۆماریی لە لایەن سەرۆک کۆماری عێراقەوە بۆ رێبوار تەها پارێزگاری کەرکوک هەنگاوێکی ئەرێنییە بۆ خزمەتکردنی پارێزگای کەرکوک، وێرای پیرۆزباییمان لەو هەنگاوە لەپێناو تەواوکردنی رێکارە یاساییەکانی تر بۆ پێکهێنانی حکومەتی خۆجێی پارێزگای کەرکوک، هیوادارین هاوڵاتییانی کەرکوک هیچ جۆرە ئاهەنگێکی جەماوەری ساز نەکەن.
ئاماژەی بەوەشکرد، جەخت لەسەر پاراستنی ئاسایش و ئۆقرەیی بۆ دانیشتووانی کەرکوک دەکەینەوە و بەهیوای چەسپاندنی شەراکەتی راستەقینەی هەموو پێکهاتە و نەتەوەکانی کەرکوک لە حکومەتی خۆجێی پارێزگای کەرکوکدا.
