ئەمڕۆ بزوتنەوەی حەماس، تیرۆرکردنی سەرۆکی مەکتەب سیاسیی خۆی لە تارانی پایتەختی ئێران راگەیاند.
لە بەیاننامەکەی بزوتنەوەی حەماس دا هاتووە، “ئەوانەی لە رێگای خودادا کوژراون بە مردوو مەزانن، بەڵکو بە زیندوویی و رزق و رۆزی لەلایەن پەروەردگارەوە بزانن”.
کوژرانی ئیسماعیل هەنییە دوای بەشداریکردنی دێت لە رێوڕەسمی دەستبەکاربوونی سەرۆک کۆماری نوێی ئێران، و لە شوێنی مانەوەی خۆی لە تاران کوژراوە.
سوپای پاسدارانی ئێران لە بەیاننامەیەکدا باسی لە کوژرانی هەنیە و ئەندامێکی تیمی پاراستنیان لە تاران کردووە، دوای ئەوەی شوێنی نیشتەجێبوونیان کراوەتە ئامانج، و دەڵێت، ” لە رەهەندەکانی رووداوی شەهیدبوونی هەنیە لە تاران دەکۆڵینەوە و دواتر ئەنجامی لێکۆڵینەوەکان رادەگەیەنین”.
هەنیە بۆ بەشداریکردن لە رێوڕەسمی دەستبەکاربوونی مەسعود پزیشکیان، سەرۆک کۆماری نوێی ئێران گەیشتە تاران و ئێوارەی دوێنێ سێشەممە چاوی بە ناوبراو کەوت.
