لە 28ی ئایاری 2013 و لەمەراسیمێکی فراواندا، بۆ یەکەمجار نەخۆشخانەی شار لە سلێمانی کرایەوە، بەو پێیەی کە نەخۆشخانەیەکی 400 تەختی فرەپسپۆڕییەکانە بە یەکێک لە گەورەترین نەخۆشخانەکانی عێراق و ناوچەکە هەژماردەکرێت.
پاش چەندین ساڵ لە دواکەوتن و تەواونەکردنی پڕۆژەی بیناسازییەکەی لەناو خەڵکدا وەک تانە بە نەخۆشخانەی (400 ساڵی) ناودەبرا وەک ئاماژەیەک بۆ تەواونەکردنی پڕۆژەکە لەبەر گەورەیی قەبارەی نەخۆشخانەکە و لەبەرئەوەی تا ئەوکات ئەزموونی هاوشێوە لە بنیادنان و بەگەڕخستنی نەخۆشخانەی لەو چەشنە دەگمەن بوو.
لەماوەی کەمتر لە دوو ساڵی کارکردنی دکتۆر میران محەمەد وەک بەڕێوبەری گشتیی تەندروستیی سلێمانی، وێڕای پێشخستنی زۆرینەی نەخۆشخانە حکومییەکان و لەبەر پێویستی زۆری هاوڵاتییان توانی هەوڵەکان کۆبکاتەوە بۆ تەواوکردنی کاری بیناسازی و هاوتەریب لەگەڵ کارەکانی ئامێرسازی و کەلوپەلی ناونەخۆشخانەدا بە سەرپەرشتی راستەوخۆی و بە توانای پزیشک و کارمەندی خۆماڵی لە 28ی ئایاری 2013 نەخۆشخانەکە کرایەوە.
دکتۆر میران، پێشتر ئەندامی ئەنجومەنی نوێنەرانی عێراق بووە و ئێستاش ئەندامی ئەنجومەنی سەرکردایەتی یەکێتیی نیشتمانیی کوردستانە.
