بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە وەفدێكی نەتەوە یەكگرتووەكان بە سەرۆكایەتیی كلاودیۆ كۆردۆن، جێگری نوێنەری تایبەتی سكرتێری گشتیی نەتەوە یەكگرتووەكان لە عێراق بۆ كاروباری سیاسی و هاریكاریی هەڵبژاردن كرد.
لە دیدارەكەدا پرسی هەڵبژاردن، ئاسایشی هەرێمی كوردستان و ناوچەكە و كێشەكانی نێوان هەولێر و بەغداد گفتوگۆیان لەبارەوەكرا، بەردەوامیی گفتوگۆی بوونیادنەرانەی لایەنەكان بۆ چارەسەركردنی كێشەكان لەچوارچێوەی دەستوور و پاراستنی مافی هەموولایەك جەختیلێكرایەوە.
لەبارەی هەڵبژاردن لە هەرێمی كوردستان و بەڕێوەچوونی لە وادەی دیاریكراوی خۆیدا سەرۆك بافڵ جەلال تاڵەبانی رایگەیاند، پابەندین بەو وادەیەی بۆ بەڕێوەچوونی هەڵبژاردن دیاریكراوە و پێویستە هەموو لایەنەكانیتریش پابەندبن، دواخستن و دروستكردنی بەربەست لەبەردەم پڕۆسەكە نەك خزمەت ناكات، بەڵكو هەرێمی كوردستان بەرەو دۆخێكی نەخوازراو ئاڕاستە دەكات.
دۆخیی ئەمنی و هەوڵەكان بۆ پاراستنی سەقامگیریی ناوچەكە تەوەرێكیتری دیدارەكەبوو و لەو بارەیەوە سەرۆك بافڵ وتی، “هەڵوێستی ئێمە روونە و پشتگیریی گفتوگۆ و لێكتێگەیشتن دەكەین وەك باشترین بژاردە بۆ چارەسەركردنی كێشەكان و ئاڵۆزترنەبوونی دۆخەكە، رێز لە سەروەری و ئاسایشی وڵاتانی دراوسێ دەگرین و پێشوازیی لە هەر هەوڵێكیش دەكەین كە ئامانجەكەی بەرقەراركردنی ئاشتی و كاری پێكەوەیی بێت لە چوارچێوەی پاراستنی بەرژەوەندییە نیشتمانییەكان”.
لەبارەی پەیوەندییەكانی نێوان هەولێر و بەغداد و كۆتاییهێنان بە ناكۆكییەكان، سەرۆك بافڵ ئاماژەی بەوەكرد، یەكێتیی نیشتمانیی كوردستان بە سیاسەتێكی نیشتمانی و پابەند پاراستن و بەهێزتركردنی قەوارەی هەرێمی كوردستان هەنگاوی ناوە، بڕوای تەواومان بە كاری پێكەوەیی و هاوبەشیی راستەقینە هەبووە لە بەڕێوەبردنی وڵات و ویستوومانە هەموولایەك لەچوارچێوەی دەستوور مافەكانیان پارێزراوبێت. پێویستە هەموولایەكیش ئەو راستییە بزانن تاكڕەوی لە بەڕێوەبردن و سیاسەتی فەرزكردنی ئیرادە بەسەرچووە و ئەوەی وڵات پێویستی پێیەتی، ئاشتی و ئارامی و فەراهەمكردنی ژیانێكی شایستەترە بۆ خەڵكە خۆڕاگرەكەی نەك ململانێی ناڕەوا.
