لە پاش دروستكردنی مۆبایلی زیرەك و دواتریش كاتژمێری زیرەك، لەئێستادا كۆمپانیا گەورەكانی بواری تەكنەلۆجیا كار لەسەر دروستكردنی ئەڵقەی زیرەك دەكەن.
كۆمپانیای سامسۆنگ دروستكردنی ئامێری (Galaxy Ring)ی نوێی ئاشكراكرد، كە ئەڵقەیەكە و بە ئاسانی لەدەستدەكرێت.
بە دروستكردنی (Galaxy Ring) سامسۆنگ دەبێتە یەكەمی كۆمپانیاكانی بواری مۆبایل، كە بچێتە ناو جیهانی دروستكردنی ئەڵقەی زیرەكەوە و بڕیارە لە 24ی ئەم مانگەوە بە نرخی 400 دۆلار بۆ هەمووان بەردەست بێت.
تایبەتمەندییەكانی ئەڵقەكە
بەپێی پێگەی ئیندپێندت، ئەڵقەی Galaxy بەهێز و ساكارە و، بە زیرەكیی دەستكرد پاڵپشتی كراوە و بەهۆیەوە چاودێریی (خەوتن، رۆیشتن، راكردن، لێدانی دڵ و پلەی گەرمای جەستە)ت دەكات.
دوای ئەوەش دەتوانێت شیكاری بۆ سەرجەم پێوەرە تایبەتەكانت بكات و ئەنجامێكت پێبدات دەربارەی ئاستی وزەت و پێشكەشكردنی رێنوێنیی تەندروست.
ئەڵقەی گالاكسی، كێبڕكێی ئەڵقەی كۆمپانیای (ئۆرا)ی پێشەنگی بوارەكە دەكات، كە پشتدەبەستێت بە بەشداریی مانگانە بە بەهای 6 دۆلار، لەكاتێكدا ئەڵقەی گالاكسی بەشداریی مانگانەی نییە، ئەمەش دەبێتە هاندەر بۆ خوازیاران و بەكارهێنەران.
