هێزی كۆماندۆی كوردستان ئۆپەراسیۆنێكیان بۆ سنووری گەرمیان ئەنجامدا و ژمارەیەك حەشارگەیان لەو ناوچانە خاپووركرد.
راگەیاندنی فەرماندەیی هێزەكانی كۆماندۆی كوردستان بڵاویكردەوە، بە پشتبەستن بە زانیارییەكانی تۆڕی هەواڵگریی سەر بە فەرماندەیی هێزەكانی كۆماندۆی كوردستان و پشتیوانیی هاوپەیمانان، بەرەبەیانی ئەمڕۆ سێشەممە 25ی حوزەیرانی 2024 چەند تیمێكی شەڕكەری “كوڕانی كۆماندۆ” لەگەڵ هێزی هاوپەیمانان ئۆپەراسیۆنێكیان بۆ سەر ژمارەیەك حەشارگەی داعش لە ناوچەی “تاوێرکەوە” لە سنووری گەرمیان ئەنجامدا.
ئاماژەی بەوەشدا، لە كاتژمێر 02:30ی خولەکی بەرەبەیانی ئەمڕۆ لە رێگەی تیمێكی یەكەی (هاوەن)ی هێزەکانمان ژمارەیەك حەشارگەی داعش خاپوور كرا و دواتر “كوڕانی كۆماندۆ” دەستیان بە كێوماڵكردنی ناوچەكە كرد، كە تیرۆرستان ناوبەناو وەك شوێنی كۆبوونەوە و دانانی پیلانی هێرشكردن بەكاریان دەهێنا، كە ئامانجی سەرەكیی ئۆپراسیۆنەكەش خاپووركردنی ئەو شوێنانە بوو، هاوكات بۆمبێکی چێنراوی تیرۆرستانیش لەلایەن تیمێكی (E.O.D)ی كۆماندۆی كوردستانەوە پۆچەڵكرایەوە، ئۆپەراسیۆنەكەش لە سەعات 10ی پێش نیوەڕۆ بە سەركەوتوویی كۆتایی هات.
فەرماندەیی هێزەكانی كۆماندۆ دووپاتیدەكاتەوە، “كوڕانی كۆماندۆ” جارێكی دیكە دڵنیایی دەدەنە كۆمەڵانی خەڵكی كوردستان، كە بەردەوام ئاگاداری هەر جموجوڵێكی تیرۆرستان دەبن و وەك هەمیشە پێشمەرگەی دڵسۆزی پارێزەری خاكی پیرۆزی كوردستان و خزمەتكاری بەوەفای خەڵك دەبن.
