بنکەی پۆلیسی دارستانی بازیان رایگەیاند، لە سنووری گوندی دەرگەزێن، کڵاشکەران و بیبی جەك زیاتر لە 500 دۆنم پوش و پاوان سووتان.
لە راگەیەندراوێکدا بنکەی پۆلیسی دارستانی بازیان ئاماژە بەوە دەکات، ”لە سنووری گوندی دەرگەزێن بە هۆکارێکی نادیار ئاگرێك کەوتەوە و دەستبەجێ مەفرەزەیەكی بنکەی پۆلیسی دارستان خۆیان گەیاندە شوێنی رووداوەکە و بە هاوکاریی بەرگریی شارستانیی قەزاکە و خەڵکی سنوورەکە توانیان ئاگرەکە کۆنتڕۆڵ بکەن، هاوکات بەهۆی ئاگرەکەوە نزیکەی 10 دۆنم پوش و پاوان و گەنمی جووتیاران و باخی دوو هاوڵاتی سووتان”.
ئەوەشیان خستووەتەڕوو، ”لە رووداوێکی دیکەی ئاگرکەوتنەوەدا، لە سنووری گوندەکانی کڵاشکەران و بیبی جەك ئاگرێکی فراوان کەوتەوە و مەفرەزەیەكی بنکەی پۆلیسی دارستان بە هاوکاریی بنکەی پۆلیسی دارستانی پیرەمەگرون و بەرگریی شارستانیی بازیان و تاسڵوجە و ئازادی توانیان ئاگرەکە کۆنترۆڵبکەن، هەروەهزەرەر و زیانی ئاگرەکە مەزەندە دەکرێت بە سووتانی نزیکەی 500 دۆنم پوش و پاوان و دەیان دار”.
