بەڕێوەبەری فەرمانگەی ژینگەی هەولێر دەڵێت، “ئەو کۆگا قیرەی ئاگری گرت و بووە هۆی برینداربوونی زیاتر لە 10 کەس، مۆڵەتی یاسایی نییە و پێویستە یان مۆڵەت وەربگرێت یاخود دابخرێت”.
دڵشاد هیرانی، بەڕێوەبەری ژینگەی هەولێر لە لێدوانێکدا بە دەنگی ئەمەریکای وتووە، “ئەو شوێنە بە نایاسایی کاری کردووە و دەبێت مۆڵەت وەربگرێت یاخود دابخرێت و رێکاری پێویست بەرامبەر بە هەموو ئەو کۆگا و پاڵاوگانەی سنوورەکە دەگرنەبەر کە بە نایاسایی کاردەکەن.
ناوبراو ئاماژەی بەوەشکردووە، رێکارەکان توندکراونەتەوە و دەبێت هەموو ئەو شوێنانەی کاردەکەن مۆڵەتی فەرمییان وەرگرتبێت لە فەرمانگەی ژینگە و وەزارەتی سامانە سروشتیەکان.
شەوی 12/6/2024 ئاگر لە کۆگای قیر و پاڵاوگە لە سنووری گوێر کەوتەوە و 20 کاتژمێر درێژەی کێشا و دواتر کۆنترۆڵکردنی ئاگرەکە راگەیەندرا، 14 کارمەندی بەرگریی شارستانی بەهۆی رووداوەکەوە برینداربوون و چوار ئۆتۆمبێلی بەڕێوەبەراییەتی بەرگریی شارستانیی هەولێر سووتا.
