بریكاری وەزارەتی سامانە سروشتییەكانی هەرێم رایدەگەیەنێت، تیمەكانمان لەسەر هێڵن كە بە زووترین كات بەرهەمهێنانی غاز لە كێڵگەی كۆرمۆر دەستپێبكاتەوە و دەشڵێت، ” لە پلاندا نییە بەرهەمی غازی كۆرمۆر هەناردەی دەرەوە بكرێت”.
د. ئەحمەد موفتی بریكاری وەزارەتی سامانە سروشتییەكانی هەرێم لە دیدارێكی تەلەفزیۆنیدا رایگەیاند، لە ماوەی رابردوودا زیاتر لە پێنج جار هێرشكراوەتە سەر كێڵگەی غازی كۆرمۆر لە كاتێكدا هەرێمی كوردستان 50 %ی غازی سروشتیی عێراقیش بەرهەمدەهێنێت.
بریكاری وەزارەتی سامانە سروشتییەكانی هەرێم جەختیكردەوە و وتیشی، “بەرهەمی غازی كۆرمۆر هەناردەی دەرەوە ناكرێت و بەهۆی هێرشەكەی دوێنێوە ئێستا تەنها 1200 مێگاوات كارەبا بەرهەمدەهێندرێت و 70%ی بەرهەمێنانی كارەبا لە رێگای غازی كۆرمۆرەوە دابیندەكرێت.
