زیادبوونی گەرمیی زەوی و ئەو شەپۆلە گەرمییانەی بەدوایدا دێت لەماوەی ساڵانی داهاتوودا دەبێتە هۆی بەرزبوونەوەی نرخی خۆراك، وڵاتانی باشووریش زەرەرمەندترین دەبن، وەك ئەوەی توێژینەوەیەكی نوێ ئاماژەی پێدەدات.
كاریگەرییەكەی بەپێی وەرز و ناوچەكان جیاواز دەبێت، بەڵام بەرزبوونەوەی پلەی گەرمیی پێشبینیكراو بۆ ساڵی 2035 دەبێتەهۆی زیادبوونی نرخی سەرچاوە خۆراكییەكان ساڵانە لانیكەم بە رێژەی 1.49%، بەپێی ئەو ژمێركارییەی ئامادەكارانی توێژینەوەكە كردوویانە، كە پێنجشەممە رابردوو گۆڤاری (كۆمۆنیكیشنز ئێرس ئاند ئینفایرۆمنت)ی سەر بە خانەی (سپرینگر نەیچەر) بڵاویكردووەتەوە.
توێژینەوەكە چی دەڵێت؟
لە خراپترین سیناریۆدا، زیادبوونەكە بەڕێژەی 1.79% دەبێت، كاریگەریشی لەسەر كۆی هەڵاوسان 0.76 و 0.91 پلەی سەدی یەك بەدوای یەك دەبێت.
ماكسیمیلیان كۆتز، بەشداربوو لە ئامادەكردنی توێژینەوەكەدا بە ئاژانسی فرانس پرێس-ی راگەیاند، لەڕێی بەراوردكردنی نرخە مێژووییەكان و تۆمارەكانی كەشوهەوا لە 121 وڵات لەنێوان ساڵانی 1991 و 2020، بەڵگەیەكی بەهێزمان دۆزییەوە كە پلەی گەرمیی بەرز، بەتایبەت لە هاویندا و لە ناوچە گەرمەكاندا، دەبێتەهۆی زیادبوونی نرخی ماددە خۆراكییەكان.
دواتریش توێژەرانی زانكۆی بوتسدام و بانكی ناوەندیی ئەوروپا هەڵسەنگاندنیان بۆ زانیارییەكان كرد لەسەر بنەمای رەوشی داهاتووی ئاووهەوای پێشبینیكراو لەنێوان ساڵانی 2035 و 2060.
بەپێی وتەی كۆتز ئەو دۆخە پێشبینیكراوە “دەبێتەهۆی زیادبوونی هەڵاوسانی نرخی خۆراك و هەڵاوسانی گشتی لە سەرتاسەری جیهان، بەتایبەت لە ناوچە زۆر گەرمەكان، وەك نیوەی باشووری گۆی زەوی”.
بەوەش ئەفریقا و ئەمریكای باشوور دەبنە زۆرترین زەرەرمەند. ناوچەكانیش دیكەش لە وەرزە گەرمەكان رووبەڕووی گرانیی نرخ دەبنەوە.
