سەرۆکی دادگای فیدڕاڵیی عێراق رایگەیاند، پێویستە مووچەخۆران و خانەنشینانی هەرێم مافەکانیان هاوشێوەی مافی مووچەخۆرانی دیکەی عێراق بێت و دەشڵێت، “قبوڵکراو نییە، ئەوان بە سێ مانگ تەنها مووچەیەک وەربگرن.”
ئەمڕۆ چوارشەممە، جاسم محەمەد عەبود، سەرۆکی دادگای فیدڕاڵیی عێراق لەگەڵ محەمەد محایەدین، سەرۆکی دادگای دەستوریی ئوردن کۆبووەوە و یاداشتێکی لێکتێگەیشتنیان واژووکرد.
لە دیدارەکەدا، جاسم محەمەد عەبود رایگەیاند، ئەرکی دادگای فیدڕاڵیی باڵا لە ئێستادا ئەوەنییە تەنها دەستوور جێبەجێ بکات بەمانای وشە، بەڵکو بەدیهێنانی بەرژەوەندی باڵای گەل و میللەت و پاراستنی یەکگرتوویی عێراقە و دابینکردنی مافە سیاسیی و ئابوری و کۆمەڵایەتییەکانی هەموو هاوڵاتییانە، ئەوەش ئەرکێکی قورسە.
وتیشی، “دادگای فیدراڵی دووپاتی کردووەتەوە، تا ئەوکاتەی نەوت و گاز هی هەموو خەڵکی عێراق بێت و داهات و سامانی نەوت هی هەموو خەڵکی عێراق بێت، دەبێت هەموو مووچەخۆران و خانەنشینانی هەرێمی کوردستان هەمان مافەکانی مووچەخۆران و خانەنشینانی ناوچەکانی دیکەی عێراقیان هەبێت.”
