بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد پێشوازی لە جینین پلاسخارت، نێردەی تایبەتی سکرتێری گشتیی نەتەوەیەکگرتووەکان لە عیراق کرد.
لەدیدارێکدا سەرۆکی یەکێتی ستایشی رۆڵی ئەرێنیی نەتەوەیەكگرتووەكانی كرد لەبەرامبەر هەوڵ و هاریكارییەكانیان لە پرۆسەی سیاسیی عیراق و هەرێمی كوردستان و جەختی لە فراوانكردنی هەماهەنگییەكان لەپێناو پاراستنی سەقامگیری لە وڵاتدا کردەوە.
لەدرێژەی دیدارەكەدا دۆخی سیاسی، پرسی هەڵبژاردن و چارەسەركردنی كێشەی مووچەخۆرانی هەرێمی كوردستان گفتوگۆی لەبارەوەكرا و جەخت لە بەردەوامیی گفتوگۆی بەرپرسیارانە كرایەوە بۆ زاڵبوون بەسەر ئاڵنگارییەكان و دەستەبەركردنی ژیانێكی شایستەتر بۆ خەڵك.
بافڵ جەلال تاڵەبانی، سەرۆکی یەکێتی لەبارەی كۆی پرسەكانەوە روونكردنەوەیدا و ئاماژەی بە هەوڵەكانی یەكێتی كرد بۆ تێپەڕاندنی ئەم دۆخە و بەڕێوەچوونی هەڵبژاردنێكی بێگەرد كە گوزارشت لە واقیعی هەرێمی كوردستان بكات و وتیشی، “دەبێت هەڵبژاردن ببێتە مایەی قوڵكردنەوەی دیموكراسی و سەقامگیریی سیاسی و كۆمەڵایەتی بەدوای خۆیدا بهێنێت”.
لە بەشێكیتری قسەكانیدا سەرۆك بافڵ رایگەیاند، “خەباتی یەكێتی لەپێناو بونیادنانی داهاتوویەكی گەشترە بۆ خەڵكە خۆشەویستەكەمان، لەو چوارچێوەیەشدا لە گفتوگۆكانمان بۆ چارەسەركردنی تەواوی كێشەكان لەگەڵ بەغداد لەسەر هێڵین و دەمانەوێت ژیان و گوزەرانی خەڵك لە هەموو ململانێكان بپارێزین”.
